“Araka ny lalàmpanorenana sy ny And 51 momba ny fifidianana sy ny fitsapankevi-bahoaka, manana 90 andro alohan’ny fifidianana farafahakeliny ny governemanta haka didim-panjakana manaika ny mpifidy”, hoy ny mpahay lalàna, i Fanahimanana Tiaray, teny Antaninarenina, omaly.
Voalaza amin’izany koa fa miankina amin’ny vinavina natolotry ny Ceni ny datim-pifidianana hatao amin’ io didim-panjakana io. Ny 9 novambra sy ny 20 desambra amin’ity taona ity izany. Raha eken’ny governemanta io daty io, manana hatramin’ny 9 aogositra izy hanapahana an’izay didim-panjakana fanaikana mpifidy izay. Izay no 90 andro farafahakeliny mialoha ny fifidianana, raha mahita ny governemanta fa tena mety tokoa ireo daty vinavinan’ny Ceni. Amin’ny 9 aogositra izany no farany hamoahana didim-panjakana fanaikana mpifidy.
Andrasana ny fanapahan-kevitry ny governemanta
Raha mitovy ny fomba fijerin’ny governemanta sy ny Ceni ny amin’izay datim-pifidianana izay, araka ny vinan’ny Ceni, hahazoan’ny governemanta mamaritra ny tetiandrom-pifidianana io didim-panjakana io. Tsy mbola tratra aoriana ny governemanta fa mbola misy efa-bolana mahery eo ny hahazoana mamoaka didim-panjakana fanaikana mpifidy.
Raha tsy mitovy ny fijerin’ny roa tonta, anjaran’ny governemanta ny mampahafantatra amin’ny Ceni ny antony rehetra tsy mahamety ny vinavina naroso. Manao vinavina indray mandeha indray ny Ceni amin’izany. Nefa manaja ny lalàm-pifidianana ihany izay rehetra tokony hatao, satria efa mamaritra ny daty azo anaovana fifidianana izany.
R. Nd.
French