Mitohy ny fitetezam-paritra ataon’ny ekipan’ny Mihava Tour. Tany an-drenivohitr’i Boeny izy ireo, ny faran’ny herinandro lasa teo. Nafampana ny raharaha, nanomboka teny am-pidirana ny tanàna hatreny amin’ny toerana nifamotoan’izy ireo tamin’ny mpanara-dia.
Nisy fotoana efa nifampisintonan’ny depiote Voninahitsy Jean Eugène sy ny mpitandro filaminana iray ny vy maranitra, natao sakan-dalana. Narahin’ny feo avo sy fifamaliana izany. Nivaha ihany anefa avy eo ka afaka nandroso nihazo ny tanàna ireo depiote, notarihin-dRandrianasoloniaiko Siteny. Natao tao amin’ny toerana Holydays ny hetsika.
Nilaza ny solombavambahoaka Voninahitsy fa miisa 12 izao ireo depiote miaraka amin’ny Mihava Tour. Mbola maro ireo hafa ho avy rehefa mametra-pialana ny filoha Rajoelina, araka ny nambarany. Notsiahivin’ny depiote Randrianasoloniaiko Siteny kosa fa tsy miaraka amin’izao fitondrana izao intsony izy ireo noho ny fampanantenana tsy tanteraka. Toy ny tsy fisian’ny asa…
Nampahafantarina tany Mahajanga ihany koa ny mpandrindra nasionalin’ny “Pro Siteny”.
Mitazona izany andraikitra izany ny depiote, Rabenirina Jean Jacques. Mpandrindra ny any Mahajanga kosa i Voninahitsy Jean Eugène sy Jaosera Irenée, miaraka amin’i Afakandro Christian.
Synèse R.
French