Notanterahina tetsy Anosy, omaly, ny fivoriana ara-potoana niarahan’ny kaominina mivondrona ao anatin’ny Ivom-panajariana ny tanàn’Antananarivo sy ny manodidina (Ipam). Kaominina manodidina ny 40 no mandrafitra izany. Ahitana ny kaominina Antananarivo Renivohitra, ny kaominina ao amin’ny distrikan’Atsimondrano, Avaradrano ary Ambohidratrimo. Nanolorana ny paikady mahakasika ny hamehezana sy hamahana ny olana sedrain’ny mponina. Tafiditra ao anatin’izany ny fitantanana ny fako, ny fahadiovana, ny fitaterana sy ny fivezivezana ary ny drafi-panajarina ny tanàn-dehibe. Tanjona ny hanatsarana ny hetra, ny fananantany, ny fako ary ny fitaterana.
Olana sedrain’ny mponina hatramin’izay ny fiparitahan’ny fako. “Anisan’ny hitarafana ny fandrosoan’ny mponina ny fahadiovan’ny tanàna”, hoy ny ben’ny Tanànan’i Tanjombato, Rakotojohary Tovo, filohan’ny Ipam teo aloha. « Zavatra manahirana eto Antananarivo ny fitantanana ny fako. Ezahina ny hamadihana izany mba ho lasa angovo azo havaozina sy ho lasa zezika biolojika“, hoy kosa ny filohan’ny ipam, Ramparaoelina Rado. Anisan’ny ezaka ataon’izy ireo ny hanodinana ny fako mba hampahaleotena ny kaominina. Iaraha-miasa amin’ny minisitera maro ary vatsian’ny Agence française de développement (AFD) vola ny tetikasa.
Mino
French