Vaovao ratsy indray ho an’ny tontolon’ny zavakanto… Nodimandry ny asabotsy maraina teo i Janga Ratah. Efa herinandro maromaro no niady tamin’ny aretina ity mpanakanto ity, ary nanao antso avo mba hanaovana tolo-tanana izy tamin’ny herinandro lasa teo. Nihetsika tokoa ireo mpanakanto namany sy ireo mpankafy ary ny izay rehetra nahatsapa fa manana adidy hifanampy ho fitsaboana azy, saingy indrisy, lavon’ny aretina i Janga Ratah.
Nodimandry teo amin’ny faha-39 taonany Rata François, fantatry ny maro amin’ny anarana Janga Ratah. Mpanoratra, mpamoron-kira ary mpandrindra ny hirany izy, ary niavaka tamin’ireo samy mpivoy ny salegy. Nanomboka tamin’ny fandihizana ka nanaraka tarika mpivoy ny gadona nentin-drazana i Janga Ratah. Tsikaritr’i Jaojoby ny talentany, ary nampiarahany tamin’ny tarika Saramba izay tarihin’ny vadiny i Janga Ratah. Nivoy ny gadona majanga izy, izay tsy niala tamin’ny fototra salegy ihany. Nanana ny fomba fitafiny nampiavaka azy an-tsehatra i Janga Ratah, ary saika nahitana azy daholo ireo “festival” tamin’iny tapany avaratra iny, toy ny “Donia” sy ny “Somaroho” ao Nosy Be, ny “Lampogno” ao Antsohihy, sns.
Zo ny Aina
French