Hamarana ny fiadiana ny ho tompondakan’i Madagasikara, taranja familiana fiarakodia ny Rallye Bosch CT Motors. Hanana ny lanjany izany satria hamaritra izay hisalotra ny ho tompondakam-pirenena 2022.
Hotanterahina ny 9 ka hatramin’ny 11 novambra ho avy izao ny Rallye Bosch CT Motors. Dingana farany hiadiana ny ho tompondakan’i Madagasikara. Fantatra izany nandritra ny valandresaka ho an’ny mpanao gazety, notanterahina teny Andraharo, ny alatsinainy lasa teo.
Hamaritra izay hibata ny amboara ho an’ity taom-pilalaovana 2022 ity, io fifaninanana io. Hatreto, mpanamory roa no hiady izay ho lohany amin’izany dia i Mathieu (Zazamaditra) sy i Fred, izay samy mpanamorin’ny klioba Asacm avokoa.
Raha tsiahivina, elanelanisa 21 no mampisaraka azy mirahalahy ka mitarika aloha hatreto i Fred. Manana lanjan’isa 1,6 ity rallye ity. Hahatratra 480, 59 km ny halavan’ity fifaninanana ity, izay misy dingana manokana (ES) miisa 12, mirefy 168, 37 km. Nambaran-dRazafindrakoto Patrick, tomponandraikitra eo anivon’ny CT Motors fa 40 ny isan’ny mpifaninana ka hanana ekipazy miisa telo izy ireo, ankoatra ny SSV, izay efa hahalalana ny orinasa. Andiany faharoa no iarahan’ny orinasa amin’ity rallye mamarana ny taom-pilalaovana ity ka hiavaka. Anisan’izany ny fanatsarana teo amin’ny lalana diavin’ny mpanamory.
Hizara roa toy ny mahazatra ny fizaran-dalana ho an’ireo mpifaninana dia ny 4 sy ny 5 ary ny 6 sy 7 novambra, ho avy izao. Ankoatra izay, omena fihenam-bidy amin’ny fikarakarana fiara ao amin’ny orinasa ireo, 15 misoratra anarana voalohany. Nisy koa ny fampahafantarana ireo kojakoja isan-karazany mampiavaka azy ireo, izay ambany vidy raha mitaha amin’ireo mpifaninana ara-barotra amin’izy ireo.
Torcelin
French