Nanomboka nivarotra solika menaka mavesatra any amin’ireo orinasa vaventy ny Vakinankaratra ny Madagascar Oil S.A (Mosa), nanomboka ny volana aogositra 2022 teo. Mba tsy hampiato ny famatsiana ataony, miroso amin’ny fanarenana ny tena ratsy amin’ny lalam-pirenena RN 1Bis ity orinasa ity, mampitohy an’i Tsimororo sy Tsiroanomandidy amin’izao fotoana firotsahan’ny orana izao.
Ezaka sy vola madiodion’ny orinasa Mosa no hanaovany izao asa vonjy taitra izao, satria mijaly loatra ny mpampiasa ny lalam-pirenena RN 1bis. Anisan’ny tena ratsy ny manomboka eo eo anelanelan’ Ankalalo-Tsiroanomandidy.
Vita amin’ny tapaky ny desambra
Nanomboka ny fiandohan’ ny volana novambra ny fametrahana ny fitaovana vaventy sy ny kojakoja hiasana. Miisa 16 tany am-boalohany ny toerana tena ratsy amin’ny Tsimiroro-Tsiroanomandidy. Efa narenina ny enina tamin’ireo, toy ny eo Ankalalo-Beravina sy ny Beravina-Iorimbato. Mitohy ny asa ary tombanana ho vita hatramin’ny tapak’ity desambra ity.
Marihina fa nahazo fahazoan-dalana mialoha avy amin’ny minisiteran’ny Asa vaventy ny orinasa Madagascar Oil SA. Nisy ny fifanarahana mazava nataon’ny roa tonta. Hitondra fampandrosoana ara-toekarena sy ara-tsosialy ny any an-toerana izao ezaka ataon’ny Mosa izao. Toraka izany koa ny anjara biriky entiny amin’ny fampiroboroboana ny sehatry ny angovo eto Madagasikara.
Hany mamokatra solika
Tsiahivina fa niforona ny taona 2004 ny Madagascar Oil SA. Izy no hany orinasa mamokatra solika sy gazy eto Madagasikara. Nanao sonia amin’ny fizarana ny vokatra amin’ny Omnis, misolo tena ny fanjakana malagasy any amin’ny Bloc 3104 any Tsimiroro.
Njaka A.
French