Nanomboka ny 29 novambra lasa teo ary hifarana anio ny fihaonamben’ny tovovavy 100 avy amin‘ny firenena afrikanina ao Kinshasa. Mitondra ny feon’ireo tanora malagasy i Olynah sy i Fehiziro avy ao amin’ny tambajotra fiseraserana U-Report Madagascar. Samy tanora U-reporter izy roa vavy. Mandritra ny hateloana, niady hevitra momba ny tena laharam-pahamehana ho azy ireo ny tanora mpivory (fanabeazana, zon’ny ankizivavy, fampanambadiana ny zatovovavy, herisetra…) sy mijery ny vahaolana mifandraika amin’ny zavatra andrasany amin’ny fiainana. Tanjon’ny fihaonana ny handrisika ireo tovovavy hitondra fanovana eo anivon’ny fiarahamonina misy azy avy. Ilaina ny fandresen-dahatra fa zava-dehibe ny fandefasana ny ankizivavy any an-dakilasy sy ny fanomezana azy sehatra ahafahany mifandray mivantana amin’ireo vehivavy manana andraikitra samihafa eo amin’ny firenena.
Nikarakara ny hetsika tany Kinshasa ny Unicef sy ny minisiteran’ny Tanora, ny minisiteran’ny Raharaha sosialy ary ny minisiteran’ny Miralenta.
Vonjy A.
French