Telo herinandro nisian’ny fihotsahana niteraka fahafatesan’olona tao Ambatofinandrahana, mpitrandraka vato iray indray no namoy ny ainy tao Ikalamavony, ny faran’ny volana teo.
Nifampitadiavan’ireo namany ny mpitrandraka vato iray, namoy ny ainy vokatry ny fihotsahan’ny tany tao amin’ny kariera iray anatin’i Bevahondrano, fokontany Mananatanana, kaominina Ikalamavony, ny 30 novambra teo. Tamin’ny fito ora hariva, naheno fianjerana goavana ireo mponina teo amin’ny manodidina. Taitra, nifarimbona nanatona ny toerana nahenoana io feo io ireo olona. Kinanjo, efa nigorodana avokoa ny tany tao anatin’ny kariera. Tovolahy iray 20 taona anefa ny mbola tavela tao anatin’izany. Nirefy 30 metatra, nanao izay ho afany nanalana ny tany nihotsaka ireo mpitrandraka. Ora iray taorian’io, hita ilay tovolahy mpitrandraka naman’ izy ireo, saingy tsy nisy aina intsony. Natolotra ny fianakaviany ity namoy ny ainy ity. Tsiahivina fa vao herinandro vitsy lasa koa no nisy roa lahy maty nihontsahan’ny tany tao anatin’ny kaominina Ambatofinandrahana.
Tsiferana R.
French