Avy naka an-keriny ny zavatra teny an-tanan’ny mpandeha taxi-be iray, saron’ny polisy nanao fanamiana sivily ny tovolahy mpanendaka iray tetsy Anosibe, omaly maraina. Nikasa hanao ny asa ratsiny toy ny mahazatra rehefa anaty fitohanana, nitilitily ireo mpandeha anaty fiara ity tontakely ity. Tamin’izany, ramatoa iray tao anaty taxi-be no lasibatra. Nofaohiny avy hatrany ny zavatra teny an-tanan’io mpandeha iray io. Nikasa hitsoaka, araka izany, ity mpanendaka ity kinanjo nandrasan’ny polisy nanao fanamiana sivily fotsiny. Raikitra ny fifanenjehana. Vokany, tra-tehaka niaraka tamin’ny zavatra avy nangalariny izy. Nentina natao fanadihadiana eny anivon’ny biraon’ny polisy ity mpisinto-mahery ity. Marihina fa anisan’ny faritra hanjakan’ny mpangarom-paosy sy mpisinto-mahery ny eny Anosibe. Matetika lasibatra ireo mpandeha taksiborosy ary ny finday no lasan’izy ireo.
Tsiferana R.
French