Tafapetraka teny Alakamisy Fenoarivo, ny alahady 4 desambra teo, ilay vata mpanova herinaratra lehibe “transformateur SWER”. Taorian’ ny andrana teknika, niverina tamin’ny laoniny ny herinaratra, miainga eo Alakamisy Fenoarivo, mamatsy ny tanàna manamorona ny lalam-pirenena voalohany RN 1 hatrany Soavinandriana Itasy.
Misy ampahany tsy mbola miverina kosa ny herinjiro, ny any Alatsinainy Ambazaha sy Ambohimiadana, ohatra, izay notanterahina, omaly alatsinainy, ny famerenana azy.
Tsiahivina fa nanome fe-potoana herinandro ny Jirama, nanarenana ny tambajotra SWER, miankandrefana, izay efa tsy nandeha ny jiro, nanomboka ny 17 novambra, nahamay ny milina iray etsy Anosizato.
Etsy ankilany, tsy foana ny delestazy eto Antananarivo sy ny manodidina, na efa nirotsaka foana aza ny orana. Voalaza mahatonga izany ny tsy fahampian’ny riandrano any amin’ireo toby mpamokatra, toy ny any Andekaleka, Mandraka, Tsiazompaniry, Antelomita, Farahantsana, Sahanivotry. Nihena kosa ny faharetan’ny fahatapahana, tsy toy ny tamin’ny herinandro, izay noho ny tsy fahampian’ny solika no voalaza ho antony.
Njaka A.
French