Kisendrasendra na tongatonga ho azy tamin’izao ve ny trangan-javatra nampisavorovoro teny amin’ny Antenimierampirenena? Nanomboka tamin’ny fampiantsoana ny Praiminisitra lehiben’ny governemanta sy ny minisitry ny Toekarena sy ny fitantanam-bola, nandalo tamin’ny fifanazavana nikato-trano, niafara tamin’ny firehidrehitry ny solombavambahoaka sasany hiroso tamin’ny fanangonan-tsonia hahazoana manao fitsipaham-pitokisana… Iza no nanao inona tamin’izany? Na teo anoloana na ny tany ambadika…
Hay tsy nanaja sy tsy nanaraka ny dingana sy ny fomba araka ny fitsipika anatiny mifehy ny Antenimierampirenena ny raharaha! Tsy vitan’izany, nisy koa ny fangalaran-tsonia. Kisendrasendra na tongatonga ho azy koa ve ny nampandamoka izay natao? Mpanao lalàna izao no tsy mahalala na izay fitsipika anaty mifehy azy akory aza… Iza koa no tao ambadika? Mila fanadihadiana ny raharaha, fa mandeha avokoa izao karazana fanambarana izao nilazan’ny sasany fa nisy tsindry tao, nisy fanakorontanana na ankasomparana…
Nefa na inona ambara sy atao toy ny hoe fanadihadiana, ohatra: efa saro-kosehina eo amin’ny politika ny tsy fifampitokisana eo anivon’ny fitondrana. Krizy politika eo anivon’ny andrimpanjakana? Efa na ny samy mpanohana fitondrana izao aza, misara-bazana sy tsy mitovy hevitra be ihany. Tsy fifampitokisana no antony? Na ny fomba fanaovana politika no tsy mandeha amin’izay izy… Tsy tsangan-kevitra no maharesy lahatra na ifandresen-dahatra sy ijoroana eo anivon’ny antoko fa tsangan’olona?
Tsy ampy na tsy misy fifampitaizana mitohy eo anivon’ny antoko: inona, ohatra, no hatao, rehefa miseho ny toy izao na izatsy fa tsy samy manao izay saim-pantany? Farafaharatsiny, mifampaka hevitra, mifampidinika… Tsy mahagaga raha miseho ho azy ety ivelany ny tsy fitoviam-pijery sy ny samy maka ho azy amin’ny fanapahan-kevitra politika. Na lamba maloto tokony hosasana any ambadika any no aseho imasom-bahoaka… Ny mpiray antoko aza tsy mitovy fijery be ihany, tsy mahagaga koa raha ifandroritana hatrany ny tsy fitoviam-pijery politika. Tsy mitondra ho amin’ny fanatsaran-javatra sy fampandrosoana, fa zary fanakorontanana sy fandravana.
Rafaly Nd.