Telo ny fifaninanana iraisam-pirenena goavana momba ny hainahandro, ka iray amin’ireny ny «International Catering Cup» na ny ICC. Hanana ekipa hifaninanana amin’ny andiany faha-8 i Madagasikara. Rahajamalala Fenosoa no hitarika, Rakotovao Bodo no miray lisitra aminy. “Coach” i Chef Lalaina Ravelomanana. “Mpiara-miasa efa ela amiko ato amin’ ny Marais Restaurant izy roa ireo ka tena atokisako. Anisan’ny hotsaraina ny “coach” amin’ity fa tsy mandray anjara”, hoy ny filazan’i Chef Lalaina, omaly.
Hotontosaina any Lyon, Frantsa ny 17 hatramin’ny 19 janoary 2023, ny fifaninanana. Ekipam-pirenena maro no nisoratra anarana, saingy 12 ihany no noraisina. “Henjana be daholo ny mpifaninana, saingy tsy matahotra izahay. Ora 18 isan’andro no anaovanay fanazaran-tena ato, ary efa amam-bolana izany. Raha sanatria ka resy tsy maninona, satria hanome izay faratampony azo hatolotra izahay”, hoy hatrany i Chef Lalaina. Ankoatra ny fahaizana sy talentan’izy ireo, hametraka ireo akora vokatra malagasy anatin’ny ketrika koa ny ekipa.
Zo ny Aina
French