Maty tsy tra-drano ilay ankizilahikely fito taona voafaokan’ny fiara iray teny Andavabato, fokontany sy kaominina Soamanandrariny, distrikan’Antanifotsy. Naratra mafy kosa ny reniny sy ny zandriny vao herintaona monja. Tokony ho tamin’ny 10 ora maraina ny alakamisy teo, nandalo teny an-toerana izy telo mianaka saika hividy kafe hosotroina. Tsy nisy nanampo na inona na inona. Nifaoka azy telo mianaka tao anatin’ny indray mipi-maso ny fiara “Renault Kangoo” nandeha mafy sady vaky kodiarana aloha. Voadona sy naratra mafy nandritra izay ilay renim-pianakaviana 27 taona . Maty tsy tra-drano kosa ilay zanany lahy. Naratra mafy koa ilay zanany herintaona. Naratra tamin’ity koa ny lehilahy mpamily 29 taona raha tsy naninona kosa ilay vehivavy niaraka taminy. Taorian’izay, noentina vonjimaika tao Ambohibary Sambaina ireo niharan-doza. Avy eo, nafindra any amin’ny hopitalin’Antsirabe.
Efa nalain’ireo mpitandro filaminana ao an-toerana omaly ilay fiara namoa-doza.
Henintsoa Hani
French