Na izany aza, namoaka fanehoan-kevitra ny vondrona mpandraharaha amin’ity sehatra ity ny taona 2022. Notsorin’izy ireo, fa « eo andalana hirodana ny sehatry ny harena an-kibon’ny tany ». Efa nisy fotoana nanairan’izy ireo, fa tsy voahaja ny lalàna, tsy mivoaka ny taratasy fahazoan-dalana, efa ho 13 taona izao. Nasongadin’ny mpandraharaha ao anatin’ilay taratasy fa ohatry ny mitady famatsiam-bola any amin’ny mpampindram-bola iraisam-pirenena ny fanjakana, andaniny, nefa azo adika fa mifanohitra amin’izany ny fahitana ny fanakanana ny fampiasam-bola, ankilany.
Mihantona ny Base Toliara
Anisan’ny tetikasa misedra olana maro ny Base Toliara, naaton’ny fanjakana nanomboka ny taona 2019, izay tsy fantatra mihitsy ny tohiny hatramin’izao. Voasoratra mazava ao anatin’ny PEM anefa, fa tanjon’io tetikasa io ny hanomezan-danja ny fitrandrahana fasimainty any amin’ny faritra Atsimo Andrefana. Hampiroborobo ny karazana seha-pihariana maro sy sady hamorona asa anarivony. Hampandroso ny fananganana fotodrafitrasa samihafa, toy ny fanamboaran-dalana vita godirao, hampiakatra ny taha entin’ny sehatry ny harena an-kibon’ny tany ao amin’ny Harinkarena faobe (PIB). Isan’ny vokatra andrasana napetrak’ity tetikasa ity, ny fampandrosoana ny faritra itrandrahana, ny asa, ny fanatsarana ny fidiram-bola maharitry ny mponina, ny fampiakarana ny fari-piainana ary ny fampitomboana ny fidiram-bolan’ny fanjakana.
Sakanana ny QMM
Ankoatra izany, misedra olana koa ny orinasa QIT Madagasikara Minerais (QMM) any Taolagnaro, nanomboka ny fiandohan’ny desambra 2022 teo. Araka ny fanambarana an-tsoratra nataony, mihantona avokoa ny asa rehetra, toy ny fitrandrahana, ny fikirakirana ny fasimainty, ny monazita ary ny zirsil. Noraisina izany fanapahan-kevitra izany, vokatry ny sakan-dalana mankany amin’ny ozinina, any Mandena, manohitohina ny filaminana izany rehetra izany.
Njaka A.
French