Nidina ny trangana Covid-19 tao anatin’ny roa herinandro satria 63 ny olona voatily fa nifindran’ny tsimokaretina, ny 10 ka hatramin’ny 16 desambra lasa teo, araka ny tatitry ny minisiteran’ny Fahasalamam-bahoaka, omaly. 851 ny fitiliana vita nahazoana io antontanisa io. 200 ny marary hatramin’ny 16 desambra lasa teo, iray ny tranga misy fahasarotana. Iray koa ny marary lavon’ny valanaretina tao anatin’ny herinandro. 67 084 ireo voamarina fa mitondra ny tsimokaretina nanomboka ny volana marsa 2020 ka hatramin’ny 16 desambra teo. 1415 ny isan’ny maty ary 66 069 ireo sitrana soa aman-tsara. Analamanga hatrany no mitana ny laharana voalohany amin’ny isan’ny tranga vaovao mahatratra 51 ; dimy any Matsiatra Ambony, roa any Ihorombe sy Vakinankaratra. Samy nahitana tranga iray avy any Menabe sy Bongolava ary Anosy. Nitombo iray ny faritra nahatiliana ny Coronavirus ho an’ny herinandro farany raha enina izy tamin‘ny tapa-bolana.
Mbola manentana hatrany ny tokony hanajana ny fepetra ara-pahasalamana ny minisiteran’ny Fahasalamam-bahoaka indrindra ho an’ny fiara fitateram-bahoaka samihafa. Misokatra tsy tapaka rahateo ny foibe manao vaksiny mahazatra manerana ny Nosy.
Vonjy A.
French