Nahafapo ny ady amin’ny fifohana zava-mahadomelina nefa mbola tsara tohizana ny hetsika sy fanamafisana ny lalàna amin’ny fifohana sigara eto Madagasikara, hoy Ramamonjisoa Haja, tompon’andraikitry ny fikambanana Ny sahy.
Nanatanteraka atrikasa momba ny mari-pamantarana ny fifehezana ny zava-mahadomelina eto Madagasikara ny fikambanana Ny Sahy, omaly, izay notanterahina teny Antaninarenina. Niompana indrindra tamin’ny tatitra sy tombana vita mikasika ny ady amin’ny fifohana zava-mahadomelina eto Madagasikara ny hetsika. Nahafapo ny ady amin’izany hatreto, raha ny tatitra nataon’izy ireo. Maro ny dingana natao nahazoana izany, hoy Ramamonjisoa Haja, tompon’andraikitry ny fikambanana. Niainga tamin’ ireo famantarana miisa 31, namantarana ny tanjaky ny ady amin’ ny sigara isaky ny firenena iray. Anisany nandinika ireo famantarana ireo i Madagasikara, niaraha-niasa teo amin’ ny fanjakana sy ny minisiteran’ny Fahasalamam-bahoaka, izay tafiditra anatin’ny «Comité Constitutif anti-tabac», ady amin’ny fiparitahan’ny zava-mahadomelina rehetra eny anivon’ny fiarahamonina eny.
Maro ny dingana vitan’i Madagasikara hatramin’izay, toy ny fanentanana sy fanampiana ireo olona te hiala sigara eto Madagasikara ka andraisana an-tanana azy ireny. Natsangana ny toeram-pitsaboana manokana izay andraisana ireo mararin’ny sigara. Efa nahazo mari-pankasitrahana intelo ihany koa i Madagasikara momba ny ady amin’ny fifohana sigara, natolotry ny OMS. Tsara tohizana ny ezaka nataon’ny fanjakana amin’ity ady ity, hoy ny fikambanana. Anisan’izany ny fiarovana ny olona amin’ny setroky ny sigara miparitaka. Efa hita sy tsapa izany any anaty fiara fitaterana sy birao…. Ampiana sy hamafisina ny lalàna miady amin’ny fifohana sigara eto Madagasikara, hoy hatrany izy ireo. Tsy manana lalàna mihatra mikasika ny ady amin’ny fifohana sigara i Madagasikara fa manana lahatsoratra maro mikasika izany fotsiny, raha ny tatitra nataon’izy ireo.
Mino ( MPianatra Asa)
French