Tsy misy fiahiana ara-tsakafo ny mponina any atsimon’ny Nosy ka tojo olana amin’izao fotoana izao. Nitondra fanampiana mitentina 45 tapitrisa dolara hampiasain’ny Fandaharanasan’ny Firenena mikambana momba ny sakafo (Pam), ny Sampandraharaha amerikanina ho an’ny fampandrosoana iraisam-pirenena (USAID) tamin’ity taona ity. Nahafahana nisoroka olana ara-tsakafo goavana ny fisian’ny tohana satria ny antsasa-manilan’ny mponina voakasika avokoa, indrindra nandritra ny fotoan’ny maitsoahitra taona 2021-2022, hoy ny solontenan’ny Pam eto Madagasikara, Pasqualina Di Sirio. Mbola misy olona an-tapitrisa ao amin’ny faritra Atsimo sy Atsimo Andrefana sahirana ara-tsakafo ary olona 500 000 hafa tratry ny tsy fanjarian-tsakafo mahery vaika, araka ny fanasokajiana momba ny fiahiana ara-tsakafo (IPC) farany. Nandritra ny volana novambra lasa teo, nahazo tohana ara-tsakafo feno ny mponina 800 000 niaraka amin’ny fanampiana ara-bola ho tantsoroka ho azy ireo amin’ny andavanandro. Afaka nandray an-tanana sy nizara sakafo ho an’ny ankizy 80 000 sy vehivavy mitondra vohoka 12 000 koa ny Pam tao anatin’izany. Vonona hanohy ny fanampiana ho an’ny marefo any Atsimo ny vahoaka amerikanina, hoy ny talen’ny fampandehanan-draharaha ao amin’ny USAID, Anne Williams rehefa nitsidika ny tanànan’Ankirikirika, ao amin’ ny distrikan’Ambosary. Nanara-maso teny ifotony ny fitsinjarana ny tohana ho an’ireo olona tena mila izany izy ireo.
Tao anatin’ny roa taona, nanolotra vola 100 tapitrisa dolara ho an’ny asan’ny PAM i Etazonia. Sora-bola anisan’ ny goavana indrindra natolotry ny mpiray ombon’antoka.
Vonjy A.
French