Tarika ivondronana mpanakanto manana ny maha izy azy indray no hiaka-tsehatra etsy amin’ny Le Zoma, Faravohitra amin’izao ankatoky ny fety izao … Mozika mavesatra avy hatrany miaraka amin’ny tarika Spirity no hatolotra ny mpitia zavakanto, rahampitso 23 desambra, manomboka amin’ny 7 ora sy sasany hariva. Tarika efa tsy zovina intsony amin’ny mozika rock. Fotoana rahateo io hihaonany mivantana amin’ny mpankafy azy.
Efa maro ny fiakarana an-tsehatra nataon’ny Spirity ka nametrahany hatrany ny maha izy azy amin’izay toerana anehoany ny talentany. Manamarina izany ireo hiran’ny tarika tsy afaka am-bavan’ny olona maro. Anisan’izany ny “Barbare”, “Fandrosoana”, “Fahatsarampanahy”, sns. “Efa tsara petraka ny zava-drehetra andraisana ny mpankafy mozika amin’io fotoana io. Hetsika maimaim-poana izy ity ary azon’ny rehetra atrehina”, araka ny nambaran’ny tomponandraikitry ny ivontoerana. “Efa vonona tanteraka izahay hanome ny tsara indrindra avy aty amin’ny tarika, izay tsy mbola nandiso fanantenana”, hoy i Zatovo, solontenan’ny tarika Spirity.
Nanangona: HaRy Razafindrakoto
French