Nampahafantatra ny tolotra ara-pahasalamana eo aminy, ny eo anivon’ny Antoka ho an’ny fahasalaman’ny fianakaviana (Afafi), omaly, tetsy Anosy. Manakaiky vahoaka izy ireo amin’izany.
“Tsy mitady tombony izahay fa manamora ny fahazoan’ny fianakaviana marefo ny fitsaboana lavorary. Miezaka mampihena ny sakana eo amin’ny vola, saina sy sosialy amin’ny fitsaboana”, hoy ny mpitantana, ny Dr Randriamalala Vero Olivia. Anisan’ny ataon’izy ireo amin’izany ny fandraisana an-tanana ny fitsaboana tsotra sy ny fitsaboana nify. Eo koa ny fidirana hopitaly ary ny fiterahana. Nambaran’izy ireo koa fa ahitana fihenam-bidy eny amin’ireo farmasia, miara-miasa amin’ny- Afafi. “Midina hatrany amin’ny 10% izany. Tsy vitan’izany fa mivarotra vokatra ara-pahasalamana amin’ny vidiny mirary izahay”, hoy ihany izy.
Tafiditra ao anatin’ny tolotra sosialy koa ny fitsidihana sy fanomezana torohevitra ary torolalana amin’ny fitsaboana. Ny fanaraha-maso ireo marary eny amin’ny tobim-pahasalamana. Manampy izany ny fanentanana ara-pahasalamana sy hetsika maimai-poana momba izany koa.
Maherin’ny 40 000 ireo fianakaviana…
Tsiahivina fa maherin’ny 40 000 ireo fianakaviana avy amin’ny vondrona samihafa, toy ny orinasa, mpampindram-bola, fikambanana, kaoperativa, ary ny kaominina Andranonahoatra, efa mpikambana eo anivon’ny Afafi. Miisa 12 ireo hopitalim-panjakana miara-miasa amin’izy ireo. Miisa 31 ny CSB ary miisa 121 ireo dokotera tsy miankina, miara-miombona antoka amin’ny Afafi. Miisa fito ny laboratoara raha 29 ireo farmasia ary miisa 16 ireo dokotera, mpitsabo manokana. Miasa eto anivon’ny faritra Analamanga sy Bongolava, miaraka amin’ny any Itasy sy Matsiatra Ambony ny Afafi, amin’izao fotoana izao.
Synèse R.
French