“Mijoro miaro ny safidim-bahoaka sy ny lalàmpanorenana ny Foloalindahy. Izy ireo no miantoka ny fandriampahalemana eto amin’ ny tany sy ny firenena. Noho izany, tsy atao ambanin-javatra ny asa sy andraikitra iantsorohana amin’izao ankatoky ny fety izao mba hamerenana ny fitokisan’ny vahoaka ny Foloalindahy”, hoy ny minisitry ny Fiarovam-pirenena (MDN) sady minisitry ny Raharaham-bahiny mpisolo toerana nandritra ny famoahana ireo manamboninahitra ambony nivoaka tao amin’ny Ecole d’Etat Major eny Fiadanana. Nohamafisiny fa amin’ny maha tandroka aron’ny vozona azy ireo, tsy natao hiaro ny tombontsoan’olom-bitsy na vondron’olom-bitsy mikononkonona fanakorontanana ny Foloalindahy fa natao hijoro sy hiaro ny safidim-bahoaka. Tokony hanana Foloalindahy vonona sy sahy hiatrika ireo ambana marolafy isika, araka ny nambarany. “Mijoro hatrany hiaro ny fiandrianam-pirenena ny Tafika Malagasy satria tany tan-dalàna i Madagasikara”, hoy hatrany izy. Marihina fa nivoaka tamin’ny fomba ofisialy ny andiany faha XXVIII ny école d’état major (EEM) nahitana manamboninahitra ambony miisa 25. Nitarika izany teny an-toerana ny MDN. Nisy ny fanolorana mari-pahaizana ireo mpiray andiany nahavita fiofanana sy fanolorana mari-pankasitrahana ireo mpiandraikitra ny andiany. Ny Komandà Ramandazafy Toavina Lalaina no sangany tamin’izy ireo. Navoitran’ny MDN ny maha zava-dehibe ny fanofanana ireo manamboninahitra ambony ho vonona sy sahy hiatrika ireo ambana satria nofanina ho mpitarika izy ireo.
Jean Claude
French