Manjelanjelatra !

Mianoka anatin’ny fetin’ny Noely tanteraka isika ankehitriny. Namaky lay ny fankalazana miezinezina ny Filoham-pirenena Rajoelina Andry. Mananjara samy mananjara ny mponin’ Anta­nanarivo. Tafiditra an-dapa, tsy misy sakana ny saramba­bem-bahoaka. Malalaka ho an’ny besinimaro tanteraka ny five­zi­vezena ao anatin’ny Lapan’Ambohitsorohitra. Vita ravaka tsara tarehy miaraka amin’ny hazavana tsy hita noanoa. Mambabo ny maso sy ny fo  ny mijery azy. Tara-pahazavana, mamelombelona fanantenana izany. Toa hadino tanatin’ny indray mipi-maso ny fahantrana sy ny fahasahiranana. Sodokan-draha tsy fahita ra­hateo izay tonga mitsidika.
Mahafinaritra e ! Saingy sanatriavin’ny vava hoe mpana­tsatso ny ezaka atao, fa raha mijery ny hodidina misy, indrindra amin’ny fiainana andavanandro dia somary sanganehana ihany. Misy lojika tsy mifanojo eo amin’ny karazana vaindohan-dra­haraha sy ny filan’ny mponina amin’ny ankapobeny. Indrin­dra miaina olana sosialy goavana ny mponin’Antananarivo amin’ny famatsiana herinaratra. Teboka tsy maintsy jerena satria antoka hisian’ny fitoniana politika sy ny fahamarinan-toeran’ny mpi­tondra ny fanomezan-danja ny filana fototra. Iaraha-ma­halala rahateo fa manomboka mipoipoitra tsikelikely ny fane­hoam-pahasosorana eny anivon’ny fiarahamonina. Tranga madinika tsy azo tsinontsinoavina. Fanamarihana kely natao, mba tsy hanaovana ny fiainam-bahoaka tahaka ny kilalao mandritra ny fetin’ny Noely izany. Hisorohana izay azo sorohina, anatin’ny vanim-potoana ilana fitoniana no nanipazana kely izay.
Na izany na tsy izany, mendrika ny seho eny an-dapa. Tsy jerena amin’ny onja miiba ny zava-misy. Hita taratra ny fa­nehoam-pitiavana ataon’ny Filoham-pirenena. Feno fahasa­hiana ny hetsika atao, any anaty « faritra mena ». Kisary mam­piseho fa lolohavina an-tampon’ny loha ny vahoaka. Tsy natao ho tompon-trano mihono amin’ny ao anaty birao fiasan’ny Filoha izay napetraky ny vahoaka ihany. Fotoana hifampizarana ny mamy, hifamelan-keloka ny Krismasy. Inoana, araka izany, fa hampiray fo ny vahoaka sy ny mpitondra ny hetsika. Hifa­me­lan’ny andaniny sy ny ankilany amin’izay nahasorena sy tsy nety. Indrindra hanamafy indray ny fihavanana sy ny fifampitokisana amin’izy ireo. Mba ho Noely hampanjelanjelatra ny fiainan-dRamalagasy, tahaka ny firedaredan’ny jiro ao anaty lapa ihany koa !

r.r