Maro ny fitantanan-draharaha tsy ara-dalàna sy tsy ara-drariny eto amin’ny firenena amin’izao, raha ny fijerin’ny eo anivon’ny Vondrona politika hafa miray (VPHM) tamin’ny fanambarana navoakany, omaly. “Izany indrindra no mahatonga ny maro an’isa miantso fikaonandoham-pirenena, hialohavan’ny fikaonandoham-paritra handinihana indrindra ny lalàmpanorenana tena izy, azo hametrahana ny andininy momba ny fiarovana azy”, hoy ny filoha mpiara-mitantanana, Rasoamaka James, nitondra ny fanambarana.
Mba tsy hohitsakitsahina sy hatao amin’izay tiana handikana azy izay lalàmpanorenana izay, rehefa hampiharina amin’izay tian’ny mpitondra hilana mba hifanaraka amin’ny tombontsoan’izy irery ihany. Eo ihany koa, ohatra, ny lalàm-pifidianana mba hisian’ny fitoviana amin’ireo mpirotsa-kofidina. Eo indrindra koa ny raharaha fitsipaham-pitokisana ny governemanta nataon’ny solombavambahoaka, izay nahitana ny tsy fahamatoran’izy ireo ka miteraka savorovoro amin’ny samy izy ihany.
Hita tamin’izany ny antso nataon’ny filohan’ny Antenimiera roa tonta sy ireo parlemantera manohana ny fitondrana ary ireo olom-boatendry sasantsasany izay miantso fitoniana amin’ny vahoaka malagasy. “Hita amin’izany ny fitsabahana andraikitra amin’ny fahefana mpanao lalàna sy ny mpanatanteraka”, hoy izy.
Very ny harem-pirenena
Hita ny fahaverezana mihoapampana ny harem-pirenena toy ny volamena milanja hatramin’ny 4,5 T, teo anelanelan’ny taona 2018-2021, izay mitentina772 milira Ar, araka ny tatitra navoakan’ny fitsarana momba ny kaonty. Nony jerena anefa ny valim-pitsarana momba ny fanondranana antsokosoko volamena 73,5 Kg, tsy nahitana ny anaran’izay tena tompon’antoka fa olona irakiraka sy mpiasa no iharan’ny sazy. Banky rompitra ny kitapom-bolam-panjakana, ka efa sahirana mila tsy hahaloa ny karaman’ny mpiasam-panjakana sy ny tsenam-panjakana intsony ny fanjakana misy. Teo koa ny fanitsakitsahana ny lalàna sy ny sata mifehy ny mpiasam-panjakana, ka taratasy tsotra nataon’ny minisitra dia ampy nanapahana ny karaman’ny mpiasam-panjakana maro.
R. Nd.
French