Voasambotry ny polisy avy ao amin’ny commissariat central Tsaralalana teny Soavimasoandro sy Analakely, ny zoma teo, ny lehilahy roa voarohirohy amina halatra moto. Raha ny fanazavan’ny polisy, nitondra moto nandeha nivavaka ny lehilahy iray ny 17 desambra 2022 lasa teo. Napetrany teo amin’ny fiantsonan’ny moto. Tsy hitany teo amin’ny toerana nametrahana azy intsony anefa ilay moto taorian’izay. Nametraka fitarainana teny amin’ny polisy avy hatrany izy momba ity raharaha ity. Tazan’ireo fianakaviana teny Antanimena ilay moto halatra saingy tsy tratran’izy ireo intsony rehefa nojerena. Ny zoma maraina tamin’ny 10 ora, tazan’ilay tompona moto teny Analakely ny moto-ny ka noraisim-potsiny ilay lehilahy nitondra azy. Nentina nanaovana fanadihadiana tao Tsaralalana ilay lehilahy nitondra azy ka nolazainy fa moto novidiany ity moto halatra ity. Nilaza izy fa hoe novidiany tamin’olona iray tanàna aminy ihany ka 1 900 000Ar ny vidiny. Vola 1 200 000Ar no efa lasan’ilay nividianany azy, raha ny fanazavany. Tratra teny Soavimasoandro ilay lehilahy nividianany azy ka noraisim-potsiny ihany koa. Nilaza koa izy tamin’ny famotoran’ny polisy fa moto novidiany ity namidiny ity ka 1 200 000Ar no nividianany azy tamina olona iray nandalo tao aminy.
J.C
French