Manao antso amin’ny tompon’andraikitra isan’ambaratongany eto amin’ny firenena, indrindra fa ny Sekreteram-panjakana miadidy ny zandarimariam-pirenena (SEG), ny Jly Serge Gellé ny fianakavian’ilay lehilahy voarohirohy tamina raharaha halatra akoho nifangaro ady tany, tao amin’ny fokontany Ambohinaorina, kaominina Fiadanana, distrikan’Ambohidratrimo. Araka ny fanazavan-dRakotoniaina Hanitra Evah, mpandraharaha eny Madera Namontana, nisolo tena ny fianakavian’ilay voampanga, ny 24 hifoha 25 desambra 2022 no nitranga ny raharaha. Halatra akoho no niantombohan’izany ka nifangaro resaka ady tany. Tratra ny olona iray nangalatra akoho ka noterena hanondro ilay voampanga ity mpangalatra ity. Ho tambin’izay, avotsotra izy. Tonga ny zandary avy ao amin’ny zana-tobim-paritra Ampangabe niaraka tamina sivily iray hisambotra azy ny alin’io fotoana io. Tsy vitan’izay fa sady nidaroka ihany koa izy ireo, araka ny fijoroana vavolombelona nataon’ireo mpitory amin’izao raharaha izao. Nofatorana sy nampadoalihana izy sady narahina vono sy daroka. Naratra vokatr’izany ity niharam-boina ity ka teo no niteraka fitarainana sy alahelo nataon’ireo fianakaviana. Manahy ny fianakaviana fa misy fiarovana tombontsoan’olom-bitsy ataon’ireo olona manampatra fahefana ireo satria mitohy hatrany ny fanaovana taratasin’omby tsy ara-dalàna ataon’izy ireo. “Tsy tokony hatao toy ireny ny olona hanaovana famotorana kanefa halatra akoho dia niafara tamin’ny famonoana olona toy izao. Notambatambazana ilay olona nangalatra akoho hiteny sy hanondro ilay havanay”, hoy hatrany ny solontenan’ny fianakaviana.
J.C
French