“Tsy maintsy vonona
amin’ny fifidianana, fa tsy maintsy arahin’asa ny fahavononana”, hoy ny fanehoan-kevitry ny Sekretera nasionalin’ny antoko TGV, Rasoamaromaka Hery, ny amin’ny fiatrehana ny fifidianana filohan’ny Repoblika, taona 2023. Izay no tombondahin’ny eo amin’ny fitondrana: tsy afa-manao fampanantenana intsony rehefa tonga ny taona 2023, tsy afa-kiteny intsony amin’ny vina hoe hanao izao na izatsy. Izay no mahatonga ny fitondram-panjakana tarihin’ny filoha Rajoelina miezaka mafy amin’ireo fiaraha-miasa sy amin’ny fanatanterahana ny velirano.
Toy izany, ohatra, ny fanombohana ny lalambe migodana. Satria any no hitsaran’ny olona ny tena. Izay no nahatonga ny antoko politika sasany nahazo vato 8% tamin’ny fifidianana. Satria notsarain’ny vahoaka amin’ny asa vita. Mbola manana tombon-dalana ihany ny fitondrana amin’izao mba miezaka
amin’ny asa miandry amin’ny 2023. Miankina amin’ny fahavitan’ny asa tao anatin’ny velirano nataon’ny filohan’ny Repoblika izany. Ny filohan’ny Repoblika no nanao velirano tamin’ny vahoaka malagasy: izy no tsarain’ny vahoaka, araka ny nambarany.
Raha tsy hita ny zavatra ataon’ny olom-boatendry, na governoran’ny faritra na minisitra, ohatra: zava-poana no horesahina amin’ny vahoaka amin’ny 2023. Fanampin’izany ihany koa ny mbola hahafahana manatanteraka ny vina tsy vita. Mbola misy herintaona latsaka kely ny fifidianana, manao izay faraheriny amin’izay azony atao ny tomponandraikitra rehetra.
R. Nd.
French