Nitrangana fanafihana tao amin’ny fokontany sy kaominina Fahizay, distrikan’Ambositra, ny alin’ny alarobia hifoha alakamisy teo. Notafihana andian-jiolahy nirongo basy tamin’izany ny mpivarotra iray eo an-toerana. Vokany, maty voatifitr’ireo mpandroba ny ramatoa tompona tsena sy ny lehilahy iray hafa namonjy voina. Lasan’ireo mpanafika ny vola rehetra sy ny entana maro. Raikitra ny hazalambo vantany vao nahazo antso ny mpitandro filaminana. Omaly vao nangiran-dratsy, nifanehitra tamin’ny zandary tao amin’ny fokontany Talaky ireo olon-dratsy. Voasambotra ny roalahy, azo teny amin’izy ireo koa ny basy miisa telo sy ny sasantsasany tamin’ireo entana voaroba. Teny an-dalana am-pikarohana ireo mpiray tendro tamin’izy roalahy, tafaporitsaka ireto voasambotra. Nanao tifi-danitra hampijanona azy roalahy ny zandary saingy nanohy ny diany hatrany ireto olon-dratsy. Vokany, voatery nitifitra ny mpitandro filaminana ka samy lavo izy roalahy. Ankoatra izay, nisy koa ny jiolahy iray lavon’ny polisim-pirenena raha izy nitsoaka iny. Noentina nanondro ny toerana misy ireo namany ity olon-dratsy saingy saika nandositra koa. Andrasana ny tohin’ny famotorana.
Henintsoa H.
French