Fianakaviana amin’ny tokantrano maro ao amin’ ny distrikan’i Bekily, Ampanihy, Betroka sy Amboasary Atsimo no manana olana amin’ny tsy fahampian-tsakafo. Efa tena miaina ambany fetran’ny fahantrana tanteraka izy ireo raha ny tatitra niraisan’ny sehatra samihafa manara-maso ny fanjarian-tsakafo «Sécurité Alimentaire Nutrition et Alerte Précoce».
Raha ny antontanisa dia tokantrano 8 amin’ny 10 ao amin’ireo distrika ireo no tena hianjadian’ny hanoanana. Ireo tokantrano ireo dia zara raha mahita hanina hohanina. Mihamafy io tahan’ny hanoanana io. Na mahita aza ireo mpiray tanindrazana ireo dia tsy mihinana afa tsy voamaina sy voly mamody vitsivitsy ampiarahana amin’ny legioma sy ravin’ anana. Ao amin’ny faritra Atsimo manontolo dia samy ahitana io olana ara-tsakafo io avokoa. Ny ao Toliara II dia tokantrano iray amin’ny roa no tena misedra olana ara-tsakafo. Izany dia noho ny tsy fisian’ny tahirin-tsakafo intsony satria lany alohan’ny fotoana novinavinaina ny sakafo.
Tsy maintsy miankin-doha sy mividy amin’ny tsena ao an-tanàna izy ireo raha te hihinana. Na izany aza, navoakan’ny tatitra fa 4% amin’ny tokantrano ao Toliara II ihany no tena nahatsapa izany hanoanana izany. Ao amin’ity distrika ity no ambany ny tahan’ny tokantrano sahirana ara-tsakafo.
Raha ny nambaran’ity tatitra sy fampitam-baovao ity dia iharan’ny hanoanana tanteraka ny ao amin’ny distrikan’Ambovombe satria tokantrano roa amin’ ny telo no iharan’izany. Ao Betroka sy Amboasary dia tokantrano iray amin’ny telo no hianjadian’ny hanoanana. Ireo tokantrano ireo dia tsy mahita hanin-kohanina ary matetika no tsy mihinana na mandry fotsy noho tsy fisian’ny sakafo sy ny vola ho enti-manana hividianana sakafo.
Tatiana A
French