Nanazava ny amin’ ny fitsipika ara-pahasalamana tsy maintsy arahina ho an’ny mpandeha avy eto Madagasikara ka hihazo an’i Chine, ny masoivohon’i Madagasikara any an-toerana.
Manomboka ny 8 janoary 2023 izao, ireo mpandeha fiaramanidina hihazo an’i Chine dia tsy maintsy manao fitiliana test PCR, 48 ora mialohan’ny handraisany ny sidina mivantana avy eto Madagasikara ho any Chine.
Ireo nahitana soritr’aretina Covid-19 nandritra ny fitiliana dia tsy afaka handray ny sidina raha tsy efa voaporofo fa sitrana sy mamerina manao fitiliana ara-pahasalamana indray. Rehefa azo ny valin’ny fitiliana ary tsy ahitana soritr’aretina Covid-19 intsony ny mpandeha iray dia tsy voatery hangataka code QR ara-pahasalamana ao amin’ny masoivoho sinoa intsony na ny consulat de Chine fa avy hatrany dia afaka mameno ny taratasy fanambaram-pahasalamana «Health Declaration» ao amin’ny ladoany sinoa amin’ny alalan’ny application WeChat, ny mpandeha, na koa amin’ny alalan’ny rohy https://htdecl.chinaport.gov.cn/htdeclweb/home/pages/healthDeclare/declare.html .
Safoana «scan» amin’ny alalan’ny telefona finday ny code QR miseho ao mialohan’ny hiakarana amin’ny fiaramanidina. Tsy voatery hanao test PCR intsony ny mpandeha tonga ao Chine rehefa mahafeno ireo fepetra ireo ary tsy voatery mandalo fihibohana ihany koa. Hentitra ry zareo Sinoa amin’ny fiarovana ara-pahasalamana anatin’ny sidina iraisam-pirenena miditra ao amin’ny fireneny sy ny tsy maintsy fanajana ny fepetra napetraka mandritra ny fidirana sy fahatongavana ao Chine.
Tatiana A
French