Manao antso avo amin’ ireo tompon’andraiki-panjakana ao amin’ny minisiteran’ny fampianarana ambony sy ny fikarohana siantifika sy amin’ny filoham-pirenena Rajoelina Andry ny vondron’ny mpianatra mahazo vatsim-pianarana any ivelany . Mikasika ny tsy mbola nandraisan’izy ireo izany ho an’ny taona 2020-2021.
Mampiara-peo anaty fanambarana miaraka ny mpianatra any Tunisie, Algérie, Indonésie, Russie, Chine, Cuba, Egypte ary Maroc.
Nisy anefa ny fampanantenana nataon’ny filoham-pirenena tamin’ireo mpianatra tany Maroc nandritra ny fandalovany tany ary efa velom-bolo ireo mpianatra ka niandrandra izany vatsy izany.
Nohamafisin’ny filan-kevitry ny minisitra nivoaka ny 7 desambra teo ihany koa ny tokony handoavana io volan’ny mpianatra io saingy hatreto tsy mbola nisy akony. Nambaran’ny Conabex tamin’ireo mpianatra fa efa any amin’ny minisiteran’ny vola ny raharaha kanefa tsy mbola ahitam-bokany.
«Tena ilainay ny vola fanampiana avy amin’ny fanjakana hahafahana mivelona sy mamita fianarana, ny resaka fahasalamana, hofan-trano, sakafo…», hoy ireo mpianatra.
Vola avy amin’ny fanjakana, fanampiana ireo mpianatra mandranto fianarana any ivelany izay tokony horaisina isan-taona ity anaovana fitakiana ity. Mitentina 250 dolara isaky ny mpianatra izany.
Tatiana A
French