Nanatanteraka ny fidinana ifotony, tany amin’ny fokontany Antanambao, Diana, ny 29 desambra lasa teo ny komity mpanara-maso, “Comité d’Orientation et Suivi” (COS). Araka izany, nisy ny tatitra vitsivitsy natao, ka nilazan’izy ireo tamin’ny mponina fa mikatona ny jono Orita, manomboka ny 1 janoary hatramin’ny 22 martsa 2023. Ary hiverina hikatona indray izany, ny 1 jona hatramin’ny 31 jolay 2023.
Ankoatra izay, toerana anisan’ny nojerena manokana ny ala honko ao Antinteraka. Taorian’izany fitsidihana izany, dia nitohy teny amin’ny fokontany Antanambao Ankerika, ny fihaonana tamin’ny mponina ny.
Nisy ny fifandimbiasam-pitenenana niarahana tamin’ny DRPEB, izay nanao fanentanana mahakasika ny Icam. Noresahiny tamin’izany, ny fikatonan’ny Jono isan-karazany, ny fanana karatra mpanjono sy ny fametahana marika ny lakana ary fampatsiahivana ny lalàna laharana 053/2015.
Teo koa ny an’ny Ben’ny Tanana, izay niezaka namolavola ny olona, mba hiala amin’ny fomba mahazatra mikasika ireo manao fanjonoana tsy manara-dalàna, ka mba hanao fikobaniana sy jono maharitra.
“Efa misy ireo mpanangom-bokatra vonona hametraka trano fampangatsihana sy hanome fiofanana ary hanome fitaovam-panjonoana, toy ny fikambanana Sahanala, izay tohanan’ny Tetikasa Kobaby.” hoy ny Ben’ ny tanàna any an-toerana.
Ny Sahanala, izay nilaza fa vonona ny hiara-hiasa amin’ny fikambanan’ny mpanjono amin’ny famerenana tamberim-bidy, mba hitondra fampandrosoana sy fiarovana ny faritra Kobabiana.
Fitia (Mpianatra Asa)
French