Mandritra ity volana ity, fifampiarahabana sy fifampirarian-tsoa hatrany. Arahaba soa, arahaba tsara. Mbola ao anatin’ny hoe fiatoana sy fitoniana politika ve izany? Voalazan’ny mpandinika sasany fa misy sy iainana hatrany ny hoe politika. Tsy azo avela ny fitondrana firenena, fitantanana tanàna… Ny politika mitondra amina adilahy no hoe tokony hatsahatra, hampandeferina, hanindrina hambompo. Efa nisy sy niainana tamin’ny faramparan’ny taona ary mby aiza izao?
Nefa eo koa ny fitenenana hoe ampiadio ny hevitra hilaminana. Izay no mahatonga ny mpanao politika sasany tsy sasatra maneho hevitra? Indrindra amin’izao ankatoky ny fifidianana izao… Atao avokoa izay azo atao, ary hararaotina ny fotoana fa tsy ho ampy izay hoe fampielezan-kevitra. Izay no mampisy ny fifampiarahabana sy fifampirarian-tsoa noho ny taona vaovao, tsy ilaozan’ny kabary sy fanamby politika avy hatrany. Tsy inona fa fidirana politika.
Fomba fiady izany? Ady fiady… Misy ny ady tsara? Midika sy mitondra inona àry izay lazaina sy atao amin’izany? Ankatoky ny fifidianana izao, mandeha ho azy ny tombana sy ny fitsarana ho misy antony sy vokany politika avokoa izay mitranga amin’izao, na izay lazaina sy ataon’ny mpanao politika. Mila fitandremana, fahamalinana… Mitondra korontana sa filaminana? Fisaraham-bazana sa firaisankina noho ny maha mpiray firenena, fankahalana sa fitiavana…
Hipoipoitra avokoa amin’izao ny karazana fikambanana, antoko, vondrona… Manohana an’itsy na iroa : manohana eo aloha amin’ny fanakanan-dalana, na manohana ao aoriana amin’ny fanomezan-tanana. Misy ny manaratsy ny hafa hanatsarana tena, na mandoka tena hanabokana ny hafa; ao ny tsy mahita sy tsy miteny afa-tsy ny ratsy hoe vitan’ny hafa, fa tsy misy izay tsara vitan’ny tena… Hiseholany sy ho sakafo isa-maraina indray ve izany rehetra amin’ity taona ity?
Misy ny toy ny mijery adin’akoholahy, sanatria? Mibitaka, mitsanga-mitoetra, mitaintaina, malahelo, tezitra… Mety hiseho sy hiainana avokoa izany amin’izao taom-pifidianana izao. Izany ve no hoe politika? Indrindra ity hoe fiatrehana fifidianana…. Antenaina sy iandrandrana rivo-baovao? Hatramin’ny fijery vaovao, fihetsika vaovao, fiteny vaovao… arakaraka izay ao anaty ao. Fidirana politika mitondra ho amin’ny inona izao? Indrindra izay ao aloha ao…
R. Nd.
French