Niakatra fampanoavana omaly, ny raharaha halatra solika an’ireo teratany sinoa mpanamboatra ny lalam-pirenena (RN5) mampitohy an’i Toamasina sy Maroantsetra.
Voasambotra ny alin’ny alakamisy hifoha ny zoma teo, ireo roalahy voatondro ho nanao ny asa ratsy. Tratra teny amin’ny fokontany Ambinany, kaominina Marimbona , distrikan’i Soanierana Ivongo izy roa lahy. Mbola sarona tany amin’ireo mpangalatra ihany koa ny “jerricans” miisa 16 nisy solika, sahabo ho 250 litatra. “Tratra teo am-pamatrarana azy teo ambony kalesa izy roalahy tamin’io fotoana io. Olona avy eto an-toerana ihany ireo mpangalatra”, hoy ny fanazavan’ny zandary ao an-toerana.
Tsy miasa irery izy roalahy fa alainy any amin’ireo mpanao lalana ireo solika ireo. Avy eo amidy eny amin’ny sisin-dalana. Araka izany, tsy maintsy misy miray tendro amin’izy roalahy ny mpiasan’ireo teratany sinoa mpanao lalana. Hatreto anefa tsy mbola nanonona ny anaran’ ireo mpiray petsapetsa aminy ireto mpangalatra tratra.
Henintsoa Hani
French