Hitokona mandritra ny fotoana tsy voafetra ny mpiasa ao amin’ny fitaleavana ny fikirakirana ny lafiny maha olona (DRH), eo anivon’ny ministeran’ny Fanabeazam-pirenena. Tsy mankasitraka ny fanalana ny taleny izy ireo.
Nanomboka omaly, mitokona mandritry ny fotoana tsy voafetra ny mpiasa ao amin’ny fitaleavana misahana ny fikirakirana ny lafiny maha olona na ny DRH, eo anivon’ny minisiteran’ny Fanabeazam-pirenena. Nilaza izy ireo fa tsy manaiky ny fanalana ny « chef de service de la gestion administratif de personnel ». « Tsy fantatra mazava ny antony nanesorana azy io ka takina ny hamerenana azy eo amin’ny toerany », hoy Rakotomalala Diamondra, filoha lefitry ny sendika.
Araka ny fanadihadiana natao teny an-toerana, efa nisy ny fitarainana an-tsoratra nataon’ny mpitokona. Nandefasana izany ny tomponandraikitra isan’ambaratongany, toy ny sekretera jeneraly sy ny talen’ny kabinetra. Manamafy ny mpitokona fa tsy ara-drariny ny fanesorana ny tale, tsy nanao fahadisoana tao amin’ny sampandraharaha izay notantanany.
Manoloana izany, mitaky ny hanafoanana ny didim-pitondrana, nivoaka tamin’ny 14 desambra, manamafy ny fanesorana ilay tale ny sendika. Mitaky ihany koa ny hanafoanana ny fametrahana ilay « cellule d’appui », rafitra tsy ao anaty rafitra ihany koa izy ireo. «Aleo hiverina amin’ny sampandraharaha tsirairay avy ny fitantanana ny asany mba hahazoana vokatra tsara», hoy hatrany ny mpitarika ny fitokonana.
Fanatsarana
Mba tsy nihainoana feon-dakolosy tokana, nisy ny fakana ny hevitry ny eo anivon’ny minisitera mpiahy. Tsy nisy ny tomponandraikitra afaka nandray teny an-toerana, tamin’ny fotoana nanaovana fanadihadiana. Nisy ihany anefa ny tomponandraikitra iray, azo an-telefaonina, omaly alina, saingy nangataka ny tsy hotononina anarana noho ny tsy fahazoana alalana manokana niresaka tamin’ny mpanao gazety. Nilaza ny loharanom-baovao fa hisy ny fanatsarana ny fomba fiasa eo anivon’ny fitaleavana momba ny fitantanana ny mpiasa, izay no antony. “Tsy maintsy hirosoana ihany koa ny fametrahana sampandraharaha manokana manerana ny faritra. Mba hikirakirana ireo antontan-taratasy “dossier d’avancement” mihantona rehetra eo anivon’ny fitaleavana daholo izany”, hoy hatrany ity tomponandraikitra ity.
Manoloana ny tsy fahafahana mahazo vaovao, raha tsy misy alalana manokana amin’ny rafitra antanan-tohatra, niezaka ny naka ny hevitry ny minisitra, Sahondrarimalala Marie Michelle, izay tomponandraikitra voalohany amin’ny departemantany, izahay. Tsy nandray ny antso an-telefaonina natao azy anefa izy, omaly alina.
Marihina, efa nisy ny fifampiresahana teo amin’ny andaniny sy ny ankilany , mikasika ny fitakiana. Nanome 72 ora ny sendikan’ny mpiasa ao amin’ny fitaleavan’ny DRH, saingy tsy nisy valin-teny mazava. Nanomboka ny fitokonana. Nilaza ny tsy hiverina hiasa izy ireo raha tsy voavaha ny olana.
Mino ( Mpianatra Asa)
French