Mitotaly fito ny trangana fakana an-keriny voarain’ny zandarimaria avy amin’ny vondrom-tobim-paritr’Imerina “central” ny taona 2022. Tao anatin’izany, olona miisa 155 voasambotra raha olona miisa enina kosa no tra-tehaka tamina sarintsarina fakana an-keriny. Nihena kosa anefa ity trangana fakana an-keriny ity raha oharina tamin’ny taona 2021. Miisa 15 ny tranga voaray am-pelatananan’ny zandary tamin’izany.
Ankoatra izay, milanja 12 kilao ny taolam-paty saron’ny zandarimaria. Mitotaly 17,208 kilao kosa ireo vato sarobidy tra-tehaka. Tafiditra tamin’izany ny “agathe – quartz rose – béryl – cristal – Gabbro – quartz fumé – Améthyste – triphane». Nilaza hatrany ny zandarimaria avy amin’ny vondrom-tobim-paritr’Imerina “centrale” fa nahatratra 1.260.000Ar ny vola sandoka sarona ny taona 2022. Tratra tao anatin’izany koa ireo masinina miisa dimy fanamboarana izany. Andanin’izay, hazo fisaka (planche) avy amin’ny voamboana 12 isa saika aondrana antsokosoko no tra-tehaka. Ao koa ireo hazo miisa 1.435 saika atao trafika ary arina 247 isa. Ankilan’izay, lavanila 444 kilao koa sarona teny amin’ ireo lalam-pirenena. Ao koa ireo toaka gasy voarara 3.825 litatra. Fiara iray sy moto halatra iray koa mbola tratra teny amin’ireo lalam-pirenena mampifandray ny renivohitra sy ny faritra.
Miisa 29 ireo basy tsy ara-dalàna saron’ny zandarimaria tamin’iny taon-dasa iny. Tafiditra amin’izany ny basy mahery vaika sy ny basim-borona ary ireo basy vita gasy maro samihafa.
Henintsoa H.
French