Notanterahina, omaly, ny lanonam-panokafana ny fifaninanam-paritra, taranja baolina kitra sokajy U19. Nahomby sahady ny ekipan’Analamanga, izay nilalao tao Antsirabe.
Nosokafana tamin’ny fomba ofisialy, omaly, ny fiadiana ny amboaram-paritra taranja baolina kitra ho an’ireo tanora latsaky ny 19 taona. Lanonana izay natao tamin’ny kianja valo, toa ny kianjan’Antalaha, Port – Berger, Tsiroanomandidy, Toamasina, Taolagnaro, Ihosy, Antsirabe, Manakara, izay voatokana hanaovana ny fifaninanana. Tsara fiantombohana ny ekipan’ny faritra Analamanga. Lavon’izy ireo tamin’ny isa 3 no ho 1 ny ekipan’i Menabe. Taorian’ny lalao nihaonan’ny ekipan’Analamanga amin’i Menabe io, hihaona amin’ny ekipan’i Vakinankaratra indray izy ireo, ny 8 janoary ho avy izao. Marihina fa haharitra telo andro eo ny dingana voalohany amin’ity fifaninanana ity. Raha toa ka ny 25 febroary hatramin’ny 5 marsa ny dingana faharoa. Tsy mbola fantatra kosa ny fotoana sy ny toerana hanaovana ny dingana famaranana.
Tsiahivina fa noho ny fanamboarana ny kianja Rabemananjara dia hiova ao amin’ny kianjan’i Port – Berger ny ekipan’i Boeny sy Sofia ary Melaky no hilalao. Noho ny olana misy amin’ny ekipan’i Melaky dia hahemotra ny 13 sy ny 14 ary 15 janoary ny lalaom-bondron’izy ireo.
Ankoatra izay, miisa 16 ny mpanazatra hitily ireo zandrikely handrafitra ny Barea, isan’izany ny mpanazatra Amada Aboudou na i Maitre Dama sy i Amed Abdou, ary Randriambololona Patrick na i Maitre Tipé.
Fitia (Mpianatra asa)
Voka-dalaon’ny andro voalohany :
Kianja Tsiroanomandidy
Itasy (5) vs (2) Betsiboka
Kianja Toamasina
Analanjirofo (2) vs (0) Alaotra Mangoro
Kianja Ihosy
Atsimo Andrefana (1) vs (1) Matsiatra Ambony (tab 5-3)
Kianja Antsirabe
Menabe (1) vs (3) Analamanga
Kianja Manakara
Amoron’i Mania (4) vs (4) Atsimo Atsinanana (tab 2-3)
French