Hetsika maro no nentina nanamarihana ny fankalazana ny faha-75 taonan’ny “Alliance Française» eto Antananarivo, na ny AFT. Tontosa ny asabotsy teo kosa ny lanonam-pamaranana ny fankalazana, tetsy Andavamamba. Nanamarika indrindra ny lanonana ny fitokanana ny trano vaovao, izay tsangambaton’ny fankalazana rahateo.
Trano vaovao lehibe, ahitana efitra fianarana miisa 9 , izay handray mpianatra avy hatrany amin’izao fidirana manaraka izao. Nisy ihany koa ny fanolorana medaly sy mari-pahatsiarovana ho an’ireo niara-niasa tamin’ny fananganana ny foto-drafitrasa sy ny fanomanana ny fankalazana. Ankoatra izay, notolorana mari-pahaizana ireo mpianatra, eo anivon’ny AFT, mendrika indrindra, nandritra ny fanadinana DELF Prime, Junior, Tous publics. Tahaka izay ihany koa ireo tanora niisa 3 tamin’ny «Plume d’or».
«Nitondra anjara biriky maro teo amin’ny fampianarana sy ny kolontsaina ary ny fitaizana ny tanora ny «Alliance Française» tao anatin’izay taona nisiany teto Madagasikara izay» hoy ny Minisitry ny Serasera sy ny kolontsaina, Ramatoa Lalatiana Rakotondrazafy Andriantongarivo. Nifanome toky ny rehetra nandritra izany fa vonona hatrany hanohy ny ezaka efa natomboka. Na ny mpanohana izany, na ny mpiara- miombona antoka. Nofaranana tamin’ny seho an-tsehatra lehibe niarahana tamin’i Mirado sy Reko Band ny fanakatonana ny fankalazana.
Lin (Mpianatra asa)
French