Mpanaparitaka vola sandoka roalahy indray no voasambotry ny zandary tao Befandriana Sud, anatin’ny distrikan’i Morombe, afakomaly. Nanatona “cash-point” iray tao an-toerana ny iray tamin’izy mirahalahy ireo. Nilaza arak’izany ity farany fa handefa vola mitetina 1 tapitrisa Ar. Tsy nisalasala ilay mpisoloky namoaka ny vola teny aminy. Teo am-panisana ny vola anefa, tsikaritr’ilay tompona “cash-point” fa vola sandoka ireto nomena azy ireto. Nataony ny fanamarinana ka hita tokoa fa sandoka ireo roa alina maro nomena azy. Nampandre avy hatrany ny zandary ity farany. Natao ny hazalambo ka voasambotra ilay lehilahy. Mbola teny aminy ireo vola sandoka. Natao ny fanadihadiana ka sarona fotoana fohy taorian’io, ilay lehilahy namany hafa. Mitohy ny fikarohan’ny mpitandro filaminana ny atidoha mpanao io vola sandoka io ao Befandriana Sud.
Tsiferana R.
French