Tontosa ny alarobia 11 janoary 2023, teny amin’ny Hotel GV INN eny Andrefan’Ambohijanahary ny lanonana famaranana ny “Masterclass International de guitare”. Hetsika nokarakarain’ny EGM Madagascar, isan’ny nizaran’i Arnito ny traikefa sy ny fahaiza-manaony ho an’ny mpitendry gitara malagasy. Nandritra ny 4 andro ny hetsika ary maimaimpoana ny fandraisana anjara tamin’izany. “Hotohizana ny hetsika sahala amin’izao ary tsy hijanona ho an’ny mpianatry ny EGM- Conservatoire de musique ihany fa ho an’ny mpankafy gitara malagasy” hoy ny Dr Ranaivo Aintso, filoha mpanorina ny EGM Madagascar.
Nitohy tamin’ny “Masterclass International de guitare” ny fizaran’i Arnito ny traikefany ho an’ny Malagasy taorian’ny hetsika nataony teny amin’ny ANAC Analamanga, teny Anosy, ny 5 hatramin’ny 7 janoary 2023 teo. Fifampizarana fahaiza-manao sy traikefa, fampiofanana sy atrikasa nisokatra ho an’ny rehetra, fampisehoana nanehoan’ny mpiofana ny fampianarana nomen’i Arnito azy ireo no nameno ny hetsika “Masterclass International de musique”. Ny “flamenca” no tena nisongadina tao anatin’ izany ary natokana ho an’ny mpitendry gitara efa manana fahaizana somary efa ambony.
Mitohy ny fizaran’i Arnito ny traikefany amin’ny mpitendry gitara malagasy. Misy ny atrikasa sy fifampizarana atao eny amin’ny Iarivo Art & Academy Ampandrana, ny 12 janoary 2023. Eo ihany koa ny ao Antsirabe, atao ao amin’ ny Maison de la Communication et de la Culture Akon’ Ankaratra Antsirabe, ny asabotsy 14 janoary 2023.
Lin (Mpianatra asa)
French