“Ekena fa manokana ny taona 2023. Fa tsy ao anatin’ny fampiasana vaovao tsy marina na amin’ny tambajotran-tserasera na amin’ny fanambarana isan-karazany no heverina fa hitaomana ny vahoaka hankahala ny fitondram-panjakana”, hoy ny minisitry ny Rano sy ny fanadiovana ary fidiovana, Ravokatra Fidiniavo, teny Avaradoha, afakomaly, manoloana ny fanelezana vaovao tsy marina tato ho ato. Tsy eken’ny fitondram-panjakana ny fanakorontanana na amin’ny endriny ankolaka na mivantana.
Apetraka tsara ny hoe: malalaka ny fanehoan-kevitra, na amin’ny tambajotran-tserasera na amin’ny haino aman-jery. Fa misy lalàna mifehy izany eto Madagasikara, ary samy tomponandraikitra amin’ izay teneniny ny tsirairay. Na olom-boafidy io, na olom-boatendry, na olom-pirenena tsotra. Tsy azo ekena ny olona mandefa sy manaparitaka vaovao tsy marina. Mikitika ny fon’ny Malagasy izany zanaka izany. Nefa tsy marina izany hoe mivaro-janaka izany, heverina hoe fanakorontanana saim-bahoaka.
“Tsy soatoavina malagasy na ara-pomban-drazana, na ara-pinoana, na ara-pivavahana, na ara-piarahamonina izany mivaro-janaka izany. Tsy amintsika Malagasy izany”, hoy izy. Nanao fanadihadiana ifotony ny fanjakana. Hita ireo fanambaran’ny tomponandraiki-panjakana any ifotony, ny fanadihadian’ny Vaomieram-pirenena mahaleo tena misahana ny zon’olombelona (CINDH)… Raha fehezina ireny, tsy nisy nivaro-janaka tany Ikongo. Misy, araka ny fanazavan’ny CINDH, ny olona mametraka ny zanany any amin’ny fianakaviana na namana fa tsy hoe amidy. Noho ny vesatry ny fiainana, mety tsy vita ny mamelona azy.
R. Nd.
French