Hisy fifidianana ihany ve amin’ity taona ity? Nilaza ny eo anivon’ny KMF/Cnoe fa tokony holazain’ ny Ceni izay fifidianana hatao amin’ity taona ity.
“Milaza ny Ceni fa mety eo anelanelan’ny 19 novambra sy ny 19 desambra izay. Mirona sy mandeha any amin’ny fifidianana filohan’ny Repoblika izany. Maninona raha tenenina hoe fifidianana filohan’ny Repobika no hatao amin’ity?”, hoy ny filoha nasionalin’ny KMF/Cnoe Fanabeazana olom-pirenena, i Namearison Robert, raha nanontaniana ny heviny momba ny tetiandrom-pifidianana.
Miteny ny lalàna fa raha misy olona any ivelany hirotsa-kofidina ho filohan’ny Repoblika, tsy maintsy mipetraka eto Madagasikara enim-bolana mialoha ny fifidianana izy. Ny dikan’izany, ny fanambarana amin’izao fotoana izao ny tetiandrom-pifidianana dia manampy ny Malagasy any ivelany te hirotsa-kofidina hody eto Madagasikara enim-bolana mialoha. Izay no takina mba hitovy ny zon’izay te hirotsa-kofidina.
Ny amin’ny lalàna hoe 60 andro farafahakeliny ary 90 andro farahabeny mialoha ny fifidianana ny famoahana ny didim-panjakana fanaikana mpifidy handatsa-bato: tsy ny hiantsoana mpifidy no namoahan’ny KMF/Cnoe fanambarana ny tokony hamoahana ny tetiandrom-pifidianana, araka ny fanazavany, fa mba hampitovy zo ny rehetra. Tokony holazaina aloha hoe: misy fifidianana ve amin’ity taona ity? Raha misy izay, fifidianana inona no hatao ary rahoviana no mety hanaovana azy?
Tokony hitovy zo ny rehetra
“Ny tian’ny KMF/Cnoe hahatongavana dia hoe: aoka hanana zo mitovy izay rehetra mieritreritra ho kandidà sy mieritreritra ho mpifidy amin’ny fifidianana”, hoy izy. Tsy voatery ho amin’ity taona ity ny tetiandrom-pifidianana. Nohamafisiny fa tokony holazaina hoe hisy fifidianana amin’ity taona ity sy amin’ny taona ho avy: fifidianana inona? Amin’izay, fantatra avokoa izay hatao.
Ny an’ny hafa any ivelany, ohatra, efa fantatra ny datim-pifidianana amin’ny volana oktobra. Nefa koninkonina sy afenimpenina ny eto Madagasikara. Zon’ny Malagasy ny mahazo vaovao: inona avokoa ny fifidianana hatao. Hisy fifidianana tokoa ve amin’ity taona ity? Miroaroa saina ny olona. Izay hatrany no mahatonga ny tsaho, araka ny nambarany.
R. Nd.
French