Namoy ny ainy tampoka noho ny fijanonan’ny fony ny lehilahy iray natory tao amin’ny mpampanofa tena tao Port-Berger, omaly. Avy any ambanivohitra, sendra nandalo tao an-toerana ity lehilahy ity. Nanantona mpampanofa tena arak’izany ny tenany ka nanaraka io vehivavy io tany an-tranony. Noho ny alina, hatairana ny an’ilay mpampanofa tena fa namoy ny ainy tampoka ilay lehilahy. Niantso vonjy ny manodidina avy hatrany izy ka nidina ifotony ny mpitsabo sy ny mpitandro filaminana. Nataon’ny mpitsabo ny fizahana ka voamarina fa namoy ny ainy vokatry ny fahafatesana natoraly io lehilahy io. Nijanona tampoka ny fony hoy ny mpitsabo. Ankoatr’io, lehilahy iray hafa koa hita faty teo an-tokontaniny tao amin’ny fokontany Alakamisy Ambositra, omaly vao mangiran-dratsy. Mponina manodidina sendra nivoaka maraina no nahatsikaritr’azy nitsirara tamin’ny tany. Tsy nahitana ratra ny vatany ary tsy fantatra mazava ny antony nahafaty azy. Nataon’ny mpitsabo ny fizahana. Naterin’ireo tomponandraikitra tao amin’ ny tranom-paty ny nofo mangatsikan’io namoy ny ainy.
Tsiferana R.
French