Ny Low kick irery ihany fa tsy misy K1 ny taranja hifaninanana amin’ny lalaon’ny Nosy, hatao eto Madagasikara amin’ity taona 2023 ity, ho an’ny Kick-boxing. Io no tapaka sy nolanian’ireo teknisianina avy amin’ireo Nosy rehetra, nandritra ny fivorian’ny CIJ (Conseil International du Jeu des Jeux des îles) voalohany, nanapahana ireo taranjam-panatanjahantena holalaovina amin’ity andiany faha-11 ity.
Hafaliana tanteraka ho an’ny FMKB ny nahatafiditra azy ireo anatin’ny lalaon’ny Nosy, hatao eto amin’ny 25 aogositra hatramin’ny 3 septambra, izay sambany saingy misy ihany ny indrokely, hoy ny teknisianina eo anivon’ny federasiona, indrindra eo amin’ny fifantenana ireo handrafitra ny ekipam-pirenena.
Manana atleta sangany maro isika, raha ny fanambarana hatrany, kanefa noho ilay izy voatokana ho Low kick ihany no taranja hifaninanana amin’io lalaon’ny Nosy io , fa tsy anatiny ny K1, izay efa nahazoantsika anaram-boninahitra maro tany ivelany.
Hiankina tanteraka amin’ny fitondram-panjakana ny tetiandro ho an’ny fampivondronana, saingy efa fantatra fa hanatanteraka fivoriambe fanao ara-potoana ny federasiona, izay azo antoka fa ny manodidina ny fiatrehana ny lalaon’ny Nosy no tena hibahanan’ny fivoriana, ankoatra ny fampahafantarana sy fandaniana ireo fandaharam-potoana ho an’ity taom-pilalaovana ity.
Mi.Raz
French