Fantatra ny talata 17 janoary 2023, fa hotanterahina ny volana mey 2023 ny fifaninanana “Miss World 2023” andiany faha-71. Manodidina ny 80 isa ny mpifaninana handray anjara amin’ity fifaninanana isan’ny lehibe eran-tany ity. Isan’ny firenena manana solontena amin’izany i Madagasikara amin’ny alalan-dRajoelina Antsaly.
Fifaninanana lehibe hahafahana mampahafantatra sy manandratra ny firenena ny “Miss World”. Rajoelina Antsaly, izay voafidy ho “Miss Madagascar 2022” no hitondra ny faneva malagasy mandritra ity fifaninanana ity. Tsiahivina fa tao amin’ny 40 voalohany no nisy an’i Anjaratiana Nelie, solontenan’i Madagasikara nandritra ny “Miss World” andiany faha-70.
Efa vonona ny mpikarakara sy ny mpandray anjara raha ho an’i Madagasikara manokana. Tanjona ny ho amin’ny tsaratsara kokoa hatrany, hoy ny mpanomana ny mpifaninana malagasy.
Tsy ny hatsaran’ny bika sy tarehy ihany no fepetra hifaninanana ao anatin’ity sehatra ity. Isan’ny hitsarana ny mpandray anjara tsirairay ihany koa ny fahalalana ankapobeny sy ny fahaizany. Misy ihany koa ny tetikasa firotsahana sy fanasoavana ny fiarahamonina handaniana sy hitsarana azy ireo.
Lin (Mpianatra asa)
French