Nampahafantarina, omaly, teny amin’ny Espace Akouna Alasora, ny hetsika Sesam (Sports Extrêmes et Salon des Arts Martiaux), andiany faha-3. Hetsika natao hampahafantarana taranja iray misehatra amin’ny “arts martiaux” sy ny «sports Extrêmes». Hampiavaka ny hetsika, ny kalitaon’ny zavatra hasehon’ireo mpandray anjara ary hisy mihitsy ny fifaninanana «stand» mendrika indrindra, ho an’ny « arts martiaux » sy ny « sports extrêmes », araka ny nambaran’ny mpikarakara, Ratsimiseta Tsiry. Hisy ny loka sy ny amboara homena izay « stand » mendrika ka fepetra maro no hitsarana izany, miankina amin’ny hatsaran’ny zavatra aseho, ny endrika ivelany sy ny haingo, ny fampisehoana na ny « démonstration » ary ny fomba fandraisana mpitsidika.
Tsy miova ny tanjona ho an’ny Sesam, dia ny hitaiza amin’ny alalan’ny seho miavaka, hitondra ny tantaran’ny taranja iray izay haranty amin’io fotoana io. « Mila manaiky hampiseho seho matihanina ny mpampiranty mba hiainan’ireo mpitsidika tontolo hafa mihitsy anaty fitoniana », hoy ny fanazavan’ny Maitre Edouard, miara-miasa akaiky amin’ny Sesam. Mialohan’ny hanaovana ity hetsika ity, izay kasaina hatao ny faran’ny volana aprily na ny fiandohan’ny volana mey, hisy ny fambolen-kazo hotontosain’ny fianakaviamben’ny Sesam, ny 25 febroary izao any Ambohimanga Rova. Tafiditra indrindra anatin’ny vinan’asany rahateo ny fikajiana ny tontolo iainana ka anton’izao fambolen-kazo izao, araka ny fanazavan-dRatsimiseta Tsiry hatrany. Hitohy amin’ny fanaovana horonantsary ireo mpandray anjara amin’ny Sesam, ny 15 marsa kosa ny fandaharam-potoana ary hofaranana amin’ny lanonana fizarana mari-pankasitrahana, aorian’ny hetsika Sesam.
Efa maro ny miara-miasa amin’ny Sesam manohana ny hetsika karakarain’izy ireo saingy mbola manentana izay malala-tanana afaka mifanohana ihany koa ny mpikarakara. « Mila tetibola ny fitaizana mba hahatratrarana ny tanjona », hoy ny nohamafisin-dRatsimiseta Tsiry.
Mi.Raz
French