“Hatramin’izao, tsy misy ny mety hoe ahiahy na tahotra ny tsy hisian’ny fifidianana. Ny tsara marihina: eo ihany ny vola, tsy hoe maivana. Ny fahaizantsika Malagasy mametraka ny rafitra isan-tsehatra miantoka ny fampahombiazan’ny fifidianana sy ny fandaminana takin’ny fanatanterahana izany fifidianana izany no zava-dehibe.” Izay no valintenin’ny mpampakateny eo anivon’ny Ceni, Andriamarotafika Soava.
Koa na manao ahoana na ahoana ny vola eo an-tanana, na kely na be: rehefa mipetrapetraka ireo rafitra sy lamina hanatanterahana ny fifidianana, tsy hampanano sarotra ny fiatrehana ny fanatanterahana izany. “Na ho azontsika avokoa aza ny vola maneran-tany, raha tsy mipetraka ny rafitra sy ny lamina enti-miatrika ny fanatanterahana ny fifidianana: zava-poana izany rehetra izany”, hoy izy.
Raha nangataka fihaonana tany amin’ny Ceni ry zareo mpiara-miombon’antoka, samy naneho ny fahavononany hanome tantsoroka ho amin’ny fanatanterahana ny fifidianana. Na ny Firenena mikambana (ONU) tamin’ny alalan’ny Pnud izany, na ny Vondrona eoropeanina tamin’ny alalan’ny masoivohony, na ny Vondrona Afrikanina (UA), na ny vondron-tany Sadc, na ireo firenena mpiara-miasa amin’i Madagasikara.
R. Nd.
French