Nahitsy sy hentitra tanteraka ny hafatra. Notanterahina tetsy amin’ny fiangonana Anglikanina, Ambohimanoro, omaly, ny herinandro fiaraha-mivavaka, notarihin’ny FFKM. Nitodika manokana amin’ny mpitondra sy ireo mpanara-dia azy ny ankamaroan’ny hafatra tamin’izany.
“Aoka samy ho dodona hihaino fa tsy maika hiteny na halaky tezitra… Mitaona antsika hifikitra hatrany amin’ny Tompo”, hoy izy ireo. Notakin’ny FFKM amin’ny mpitondra ny hampihenana ny fidangan’ny vidim-piainana, mampikaikaika ny vahoaka. Nohitsin’ny hafatra mba tsy ho latsaka anatin’ny halatra sy ny fifamonoana, ny fanararaotana samihafa… Aoka hikatsaka ny rariny ka hanalavitra ny kolikoly sy ny fanambakana amin’ny endriny samihafa.
Fampitsaharana ny fifampihantsiana
Notsindrin’ny FFKM ny hampitsaharana ny fifampihantsiana eo amin’ny ankolafy politika fa samy hiezaka hiaraka handinika ny hampandroso ny fiainan’ny vahoaka. Tena miaina anaty fahantrana lalina, araka ny hafatry ny fiangonana.
Etsy andaniny, nohamafisin’ny FFKM ny tapaky ny komity foibe faha-44 tany Ambatondrazaka, ny novambra teo, amin’ny fanoheran’ny fiangonana ny fitsaram-bahoaka, ny tsy fanajana ny aina ary ny famonoana ny zaza any am-bohoka. “Miantso antsika hanome hasina ny aina”, hoy ihany izy ireo. Nanterin’izy ireo koa ny hampitsaharana ny fanimbana ny tontolo iainana, ny fandoroana tanety, ny fandaniana rano fahatany, ny loto etsy sy eroa.. Aoka hamboly hazo mba ho tany maitso ity Nosy ity ka hiaina sy hivelatra ary hiadana isika, araka ny hafatra hatrany.
Fihaonambem-panorenana ny firenena
Natsidiky ny FFKM koa ireo dingana samihafa, ahatongavana amin’ny fihaonambem-pirenena ho amin’ny “Fanorenam-pirenena”, araka ny lohahevitra : Fiangonana manorina sy mamboly”. Hatao ny 29 hatramin’ny 31 marsa eto Antananarivo ny fivorian’ny solontenan’ny fiangonana efatra avy amin’ny faritany 35. Hitohy ny volana mey izao izany amin’ny alalan’ny fihaonambe-paritra ary hotanterahana ny Aogositra kosa ny fihaonamba FFKM.
Ankoatra izany, nohamafisin’ny hafatra ny hanarahan’ny fiangonana maso ny fifidianana, amin’ny alalan’ny Andrimaso FFKM ho fitaizana ny olom-pirenena. Nentaniny koa ny rehetra hisoratra anaty lisi-pifidianana sy handeha hifidy.
Synèse R.
Notanterahina tamin’izany ny famindram-pitantanana eo anivon’ny FFKM. Hitondra izany, amin’ity taona ity ny filohan’ny FJKM, ny mpitandrina Andriamahazosoa Irako Ammi, raha ny filohan’ny Anglikanina (EEM), ny Mgr Ranarivelo Samoela Jaona no nisahana izany teo aloha. Anisan’ny niatrika ny fotoam-bavaka ny praiminisitra sy ny mpikambana vitsy avy amin’ny governemanta ary ny filohan’ny Antenimierandoholona sy ny filohan’ny Ceni. Teo koa ny avy amin’ireo eo anivon’ny fanoherana.
French