Tratra teo am-panosehana moto halatra teny Ambilanibe ny jiolahy iray. Ny polisy avy ao amin’ny compagnie urbaine d’intervention, Tsaralalana no nahasambotra azy ny asabotsy teo. Tsikaritr’ireo olona miasa manoloana ny tobin-tsolika iray eo Ambilanibe ny fihetsika hafahafa sy kaodikaody nataon’ilay jiolahy teo am-panosehana moto. Tsy vitan’izay fa mitoditodika sady mijery ny manodidina izy. Niantso olona avy hatrany ireo olona teo amin’ny manodidina nahita ny fihetsik’ity jiolahy ity. Vokany, tsy lasa alavitra izy dia tratra. Rehefa natao ny fisavana, tsy nanana taratasy momba ilay moto na iray akory aza ity jiolahy ity. Tsy nisy fanalahidy teny aminy nandritra ny famotorana azy. Nilaza izy fa nopitsohiny ny lohan’ity moto ity tamin’ny fotoana nangalarany azy mba hahafahany manosika azy. Nambarany tamin’ny polisy fa mpanamboatra moto no asany ka mangalatra moto izy ary ovainy sy amboariny izany avy eo. Nentina nanaovana fanadihadiana eny amin’ny polisy izy taorian’izay.
Jean Claude
French