Tsy haka mpilalao ivelany ny GNVB (Gendarmerie Nationale Volley-Ball) lehilahy, mandritra ny fiadiana ny CCC zone 7. Raha ny angom-baovao voaray, seleksiona avy amin’ny GNVB 1 sy GNVB2 no handrafitra ny ekipan’ny Zandarmaria amin’ity andiany 2023 ity. Lalao izay tsiahivina fa hatao atsy amin’ny Nosy Maorisy, ny 23 febroary hatramin’ny 5 marsa. Tsy ataon’ny mpitantana ambanin-javatra ny fiatrehana ity fifaninanana ity, satria dia izy ireo irery no solontenan’i Madagasikara, eo amin’ny sokajy lehilahy. Nahatonga azy ireo hanamafy ny kliobany amin’ny fiantsoana ireo mpilalao heveriny fa sangany, avy amin’ireo klioba roa , izay vokariny avokoa. Azo antoka ihany koa, fa misy fiaraha-miasa sy toro-hevitra avy amin’ny federasiona ny fandrafetana ity solontenantsika hiatrika ny CCC zone 7 ity, izay miendrika ekipam-pirenenakely. Fotoana hahafahana sahady koa mandrefy azy ireo, amin’ny ho fiatrehana ny Lalaon’ny Nosy hatao afaka volana vitsivitsy eto amintsika. Ity ihany koa no mety lalao farany hihaonana, mialoha ny JIOI, izay efa samy manomana avokoa ireo Nosy rahavavy amin’izao fotoana izao.
Mi.Raz
French