Ho fetin’ny baolina kitra ny eto Madagasikara amin’ ity asabotsy ity, amin’ny fanarahana mivantana ny dingana ampahefa-dalana, hiadiana ny ho tompondakan’i Afrika, ho an’ireo mpilalao tsy matihanina “Chan 2022”, tanterahina any Algérie. Na eo aza ny fisian’ny andro ratsy, tsy manakana ireo mpankafy ity taranja mpanjakan’ny fanatanjahantena ity, tsy hilanona izany, indrindra fa miditra an-tsehatra ny Barea de Madagascar, anio alina. Manoloana izany, mangataka amin’ireo orinasa mpanohana na ny fitondram-panjakana, ireo mpankafy marobe mba hametrahana «Fan zone» hisian’ny «écran géant», hiarahana miaina amin’ireo faritra malalaka eto an-drenivohitra.
Tsy ireo eto Antananarivo ihany ny mitalaho ny hisian’izany fa ireo any amin’ ny faritra 21 hafa manerana an’i Madagasikara. Te hamerina ny fetibe, toy ny nahombiazan’ny Barea zokiny, nandritra ny Can 2019, natao tany Egypta, ireo mpanohana ny Barea de Madagascar.
Mandra-piandry izany, efa betsaka ireo fianakaviana no manao fandaharam-potoana hiaraka hijery ary efa manomana sakafo sy zava-pisotro hiandrasana sy hiainana ny lalaon’ny Barea sy i Mozambika. Nambaran’ izy ireo fa hidina eny an-dalambe raha toa ka mivoaka ho mpandresy ny Barea, anio.
Mandresy amin’ny isa 2 no ho 0 ny Barea de Madagascar, raha ny vinavinan’ireo mpijery nanaovana fanadihadiana. Manantena, araka izany, ireo mpijery fa hanome fahafaham-po azy ireo ny mpitondra fanjakana sy ireo orinasa isan-tokony, manohana ny baolina kitra malagasy indrindra ny Barea de Madagascar, ka hametraka fahitalavitra goavambe hijeren’izy ireo ny lalaon’ny Barea, anio.
Tompondaka
French