Nifarana teo amin’ny dingana manasa-dalana ny dian’ny Barea de Madagascar, eo amin’ny fiadiana ny ho tompondakan’i Afrika, taranja baolina kitra ho an’ireo mpilalao tsy matihanina “Chan 2022”. Resin’ny Lion de Teranga ry zalahy.
Noravain’ny Liona-n’i Teranga Senegal, ny nofinofin’ny Barea de Madagascar eo amin’ny fiadiana ny ho tompondakan’i Afrika, taranja baolina kitra ho an’ireo mpilalao tsy matihanina “Chan 2022”. Notapahin-dry zalahy, teo amin’ny manasa-dalana ny dian’ny Malagasy. Resin-dry zalahy, tamin’ny isa 1 no ho 0 ny Barea. Fihaonana, notanterahina omaly tao amin’ny kianja Nelson Mandela.
Nanohitra ihany ny Barea saingy natanjaka sy nanantombo teo amin’ny fifehezana ny kianja ny senegaly. Vao nanomboka 5 mn ny lalao dia efa nanokatra ny isa ry zareo Liona, tamin’ny alalan’i Dialo, taorian’ny tolotra nataon’i Sané. Niezaka nanafika ihany ny malagasy saingy nirafitra tsara ny fiarovantenan’ny Liona ka tsy tafavoaka mihintsy ireo lohalaharana malagasy, nahitana an-dRakol sy i Jean-Yves. Porofon’izany, tsy tafiditra tao anaty faritra tsy azo ivalozana mihintsy ry zalahy ary tsy nahavita nitifitra tao anaty tsatobyn-dry zareo senegal.
Totoafo ny fanafihana senegal ary tao amin’ny sisiny havanana nisy an’i Avizara hatrany no niainga izany. Afaka nanao tolotra hatrany i Mbaye, izay nanahirana ny vodilaharana malagasy. Nentin’ny roa tonta niala sasatra io isa tokana, 1 no ho 0 io.
Tsy tafavoaka mihitsy
Fizaram-potoana faharoa, nanova mpilalao i Rôrô mpanazatra. Nesorina i Jean-Yves nampidirina i Carlos. Tsy mbola tafavoaka ny Barea. Tetsy an-kilany, sempotra ry Tantely sy i Berajo nanakana ny fanafihana totoafon’i senegaly. Anisan’ny nanavotra betsaka ny Barea i Nina, mpiandry tsatoby.
Noteren’ny Liona ihany koa ny teo afovoan’ny kianja ka tsy afaka nampita baolina tany amin’ny lohalaharana ireo irakiraka. Mbola nanova mpilalao indray i Roro, ka nesorina i Rakol sy i Tsiry ary niditra i Tendry sy i Onja. Tsy nampiova inoninona anefa izany.
Tapitra ihany koa ny fihaonana. Hiady ny toerana fahatelo hiadiana ny medaly alimo amin’i Niger, izay nomontsanin’i Algerie, tamin’ny isa mavesatra, 5 no ho 0 ny Barea. Fihaonana, hotanterahina ny zoma ho avy izao.
Hiatrika ny famaranana kosa i Senegal sy i Algerie, ny asabotsy ho avy izao.
Tompondaka
French